Thu, 13 August 2015
 |
| តម្លៃអចលនទ្រព្យដាក់លក់ក្នុងរាជធានីភ្នំពេញ។ |
ស្របពេលនឹងការប្រកាសបើកគម្រោងផ្សារទំនើប AEON MALL ទីពីរនៅតំបន់ពោងពាយ ខណ្ឌទួលគោក បានធ្វើឲ្យតម្លៃដីនៅជុំវិញតំបន់នេះបានទ្បើងថ្លៃយ៉ាងគំហុកដែលបានធ្វើឲ្យអ្នកជំនាញក្នុងវិស័យអចលនទ្រព្យសម្តែងការព្រួយបារម្ភពីបញ្ហានេះ។
ម្ចាស់ដីទំហំ ៤ ហិកតាដែលបាននិយាយក្នុងលក្ខខណ្ឌមិនបញ្ចេញឈ្មោះ និងបាននិងកំពុងដាក់លក់ដីរបស់ខ្លួនស្ថិតនៅតាមបណ្តោយវិថីឧកញ៉ា ម៉ុង រិទ្ឋី ដែលមានចម្ងាយប្រមាណ ៨០០ ម៉ែត្រពីតម្លៃសាងសង់ផ្សារទំនើប AEON MALL ទី ២ បានថ្លែងថាតម្លៃដីនៅតំបន់នេះបានកើនទ្បើងជារៀងរាល់ឆ្នាំជាក់ស្តែងកាលពីឆ្នាំមុនដីរបស់លោកមានតម្លៃពី ៣០០ ទៅ ៤០០ ដុល្លារប៉ុណ្ណោះក្នុងមួយម៉ែត្រការ៉េ ប៉ុន្តែឆ្នាំនេះបានទ្បើងថ្លៃខ្ពស់។
លោកបានប្រាប់ថា៖ «តម្លៃដីកើនទ្បើងខ្ពស់បែបនេះដោយសារតំបន់នេះមានការអភិវឌ្ឍខ្លាំងនាពេលអនាគតព្រោះមានតម្លៃអភិវឌ្ឍន៍លំនៅឋាន អគារខ្ពស់ និងផ្សារទំនើបច្រើន»។
លោកបន្តថា៖ «ដោយសារដីរបស់ខ្ញុំមានទំហំធំទើបលក់តម្លៃប៉ុណ្ណឹងប៉ុន្តែម្ចាស់ដីដែលមានដីតូចៗពួកគេលក់ក្នុងតម្លៃចាប់ពី ១០០០ ទៅ ១២០០ ដុល្លារឯណោះក្នុងមួយម៉ែត្រការ៉េ»។
ទោះជាយ៉ាងណាលោកមិនដឹងពីគម្រោងបើកផ្សារទំនើបនៅតំបន់នេះទេប៉ុន្តែលោកបានស្វាគមន៍ចំពោះគម្រោងផ្សារទំនើបថ្មីនេះ និងរំពឹងថា តម្លៃដីនៅជុំវិញតំបន់នេះនឹងបន្តទ្បើងថ្លៃបន្ថែមទៀតនាពេលអនាគត។
អ្នកស្រី ប៉ាង សុខេង ដែលបានចាកចេញពីស្រុកកំពង់សៀម ខេត្ត កំពង់ចាម មករស់នៅ រាជធានី ភ្នំពេញ កាលពី ៥ ឆ្នាំមុន និងបច្ចុប្បន្នមានមុខរបរជាអាជីវករនៅតាមបណ្តោយផ្លូវ ហាណូយ ដែលមានចម្ងាយប្រមាណជាង ១ គីទ្បូម៉ែត្រពីបឹងពោងពាយបានថ្លែងថាអ្នកស្រីពិតជាសប្បាយចិត្តប្រសិនជាមានផ្សារទំនើបនៅតំបន់នេះ ព្រោះអ្នកស្រីមិនដែលបានដើរផ្សារទំនើបធំៗដូចជាផ្សារ AEON MALL នោះទេហើយអ្នកស្រីក៏មិនដែលបានដើរកម្សាន្តនៅផ្សារទំនើប AEON MALL ទី ១ ដែលស្ថិតក្នុងសង្កាត់ទន្លេបាសាក់ទេ។
អ្នកស្រីបន្តថា៖ «តម្លៃដីសព្វថ្ងៃនៅជុំវិញតំបន់នេះបានទ្បើងថ្លៃខ្ពស់ណាស់ខ្ញុំលឺគេទារតម្លៃរហូតដល់ ១០០០ ទៅជាង ១០០០ ដុល្លារទ្បើងទៅ។ ខ្ញុំគ្មានលទ្ធភាពទិញនោះទេព្រោះខ្ញុំជួលដីគេរស់នៅប៉ុណ្ណោះនាពេលសព្វថ្ងៃនេះ»។
 |
| ទីតាំងអចលនទ្រព្យកំពុងឡើងថ្លៃយ៉ាងគំហុកក្បែរ គម្រោងសាងសង់ផ្សារទំនើប AEON MALL ទី ២ |
លោក គីម ហ៊ាង នាយកគ្រប់គ្រងទូទៅនៃក្រុមហ៊ុនខ្មែររៀលអេស្ទេតបានថ្លែងថាការកើនទ្បើងតម្លៃដីនៅតំបន់នេះបានធ្វើឲ្យអ្នករកទិញដីទិញមិនបាន និងអ្នកចង់លក់ដីក៏រកអតិថិជនមិនបានព្រោះតម្លៃដែលម្ចាស់ដីទាមទារនាពេលបច្ចុប្បន្ននេះគឺខ្ពស់ណាស់។ ដីមួយម៉ែត្រការ៉េមានតម្លៃរហូតដល់ ៥០០ ទៅ ១០០០ ដុល្លារមិនអាចទិញយកមកអភិវឌ្ឍអ្វីបានទេព្រោះបើធ្វើផ្ទះល្វែង និងផ្ទះវីទ្បាលក់ក៏លក់មិនបានដែរព្រោះត្រូវចំណាយទៅលើតម្លៃដីខ្ពស់ពេកដូច្នេះមានតែធ្វើជាអាគារខ្ពស់ប៉ុណ្ណោះប៉ុន្តែការកសាងអគារខ្ពស់នៅតំបន់នេះមិនទាន់ដល់ពេលនោះទេ។
លោកបានឲ្យដឹងថា៖ «តម្លៃដីទ្បើងខ្ពស់បែបនេះគឺទ្បើងដូចពពុះសាប៊ូជាការទ្បើងតាមគ្នាហើយខ្ញុំរកមូលហេតុដែលធ្វើឲ្យតម្លៃដីទ្បើងខ្ពស់ដល់កម្រិតនេះមិនឃើញនោះទេ»។
លោកបន្ថែមថា៖ «នេះមិនមែនជាតម្លៃដីពិតប្រាកដទេតម្លៃដីពិតប្រាកដគឺជាតម្លៃដែលអ្នកទិញហ៊ានទិញ។ ចំណែកតម្លៃដែលអ្នកលក់ទាមទារមិនមែនជាតម្លៃពិតប្រាកដនោះទេ»។
លោក គីម ហ៊ាង បានបន្ទោសការប្រកាសគម្រោង AEON MALL ទីពីរមានសភាពលឿនពេកដែលការប្រកាសនេះបានធ្វើឲ្យតម្លៃដីនៅជុំវិញតំបន់នោះកើនទ្បើងពី ៣០០ ដល់ ១០០០ ដុល្លារក្នុងមួយម៉ែត្រការ៉េ។
កាលពីចុងសប្តាហ៍ទី ១ នៃខែសីហា កន្លងមកនេះ ក្រុមហ៊ុន AEON ខូអិលធីឌីបានប្រកាសគម្រោងផ្សារទំនើបទី ២ របស់ខ្លួននៅតំបន់ក្រុងរណបពោងពាយដែលទីតាំងរបស់ផ្សារទំនើបថ្មីនេះមានទំហំផ្ទៃដី ១០ ហិកតា មានទំហំអគារសរុបចំនួន ១៥១ ០០០ ម៉ែត្រការ៉េ (រួមទាំងចំណតយានយន្ត) មានចំណតរថយន្តដែលអាចចតរថយន្តបានចំនួន ២ ៥០០ គ្រឿង និងម៉ូតូ ២ ០០០ គ្រឿង។ ផ្សារទំនើបថ្មីនេះគ្រោងបើកដំណើរការនៅពាក់កណ្តាលឆ្នាំ ២០១៨ ខាងមុខ។
អគ្គនាយកក្រុមហ៊ុនប៊ុណ្ណារៀលធីគ្រុប លោក ស៊ឹង ប៊ុណ្ណា បានថ្លែងថា តម្លៃដីនៅក្រុងភ្នំពេញ បច្ចុប្បន្ន មានតម្លៃខ្ពស់បើធៀបនឹងទំហំសេដ្ឋកិច្ច និងសកម្មភាពពាណិជ្ជកម្មរបស់កម្ពុជា។ តម្លៃដីកើនខ្ពស់បែបនេះបានធ្វើឲ្យប៉ះពាល់ដល់ដំណើរអភិវឌ្ឍន៍កម្ពុជា និងអាចលំបាកក្នុងការទាក់ទាញអ្នកវិនិយោគពីបរទេសព្រោះពេលតម្លៃដីទ្បើងថ្លៃខ្ពស់គឺបានធ្វើឲ្យការចំណាយទុនធំប៉ុន្តែពួកគេមិនអាចរកចំណូលត្រឡប់បានសមនឹងទុនដែលពួកគេចំណាយនោះទេ។
លោកបន្តថា៖ «ការលើកទ្បើងថាតម្លៃដីនៅកម្ពុជាទាបជាងប្រទេសជិតខាងវាជាការពិតប៉ុន្តែបើគិតពីទំហំសេដ្ឋកិច្ច និង ទំហំពាណិជ្ជកម្មរបស់គេក៏ធំជាងកម្ពុជា ផ្ទុយទៅវិញតម្លៃដីខ្ពស់នៅកម្ពុជាគឺមិនសមស្របនឹងទំហំសេដ្ឋកិច្ច និងសកម្មភាព ពាណិជ្ជកម្មរបស់ខ្លួននោះទេ»៕
___________
ប្រភពដើម៖ ព័ត៌មាននេះដកស្រង់ចេញពី ភ្នំំពេញ ប៉ុស្តិ៍