Thu, 27 August 2015
ស្របពេលដែលសហគមន៍អាស៊ានកំពុងតែចាប់ផ្តើមរៀបចំធ្វើសមាហរ័ណកម្មសេដ្ឋកិច្ចអាស៊ាននៅចុងឆ្នាំនេះដែលអាចនឹងផ្តល់សក្តានុពលខ្លាំងសម្រាប់ការវិនិយោគអចលនទ្រព្យទៅក្នុងអន្តរទីផ្សារគេសង្កេតឃើញថាតំបន់នេះផ្ទាល់ក៏កំពុងតែជួបប្រទះនឹងការថយចុះនៃទីផ្សារគឺលើកលែងតែប្រទេសកម្ពុជាដែលនៅតែបង្ហាញឲ្យឃើញពីតួលេខដែលនៅតែកើនឡើងជាលំដាប់។ នេះបើតាមទិន្នន័យក្នុងរបាយការណ៍ស្តីពីសន្ទស្សន៍ក្នុងការអភិវឌ្ឍរបស់ Knight Franks Asia Development Index។
របាយការណ៍ដដែលនេះបានបញ្ជាក់ថានៅក្នុងពាក់កណ្តាលដំបូងនៃឆ្នាំ ២០១៥ នេះតម្លៃដីធ្លីនៃតំបន់លំនៅឋាននៅក្នុងតំបន់អាស៊ានបានធ្លាក់ចុះពី ៣ ភាគរយដល់ ១,១ ភាគរយបើប្រៀបធៀបទៅនឹងរយៈពេល ៦ ខែមុននោះ។ ក្នុងខណៈពេលនេះដែរតម្លៃទីតាំងសំខាន់ៗសម្រាប់ការិយាល័យនៅក្នុងតំបន់នេះបានកើនឡើងពី ២,៦ ភាគរយទៅ ៣,៦ ភាគរយ។
ចំពោះទីផ្សារលំនៅឋានទំនើបៗនៅប្រទេសសិង្ហបុរី និងប្រទេស ម៉ាឡេស៊ី បានថយចុះដើម្បីឆ្លើយតបទៅនឹងការពិនិត្យមើលដោយប្រើប្រាស់វិធីសាស្ត្រដូចជាការអនុវត្តច្បាប់ពន្ធដារសេវាកម្ម និងទំនិញរបស់ប្រទេសម៉ាឡេស៊ី។ រីឯវិស័យលំនៅឋានរបស់ប្រទេសឥណ្ឌូនេស៊ីវិញគឺត្រូវបានរារាំងដោយសារសន្ទុះធ្លាក់ចុះនៃសេដ្ឋកិច្ចដែលបានធ្វើឲ្យប៉ះពាល់ដល់ទំនុកចិត្តរបស់អតិថិជន។
ដោយឡែកទីផ្សាររបស់ទីក្រុងបាងកកបានបែរទៅរកវិស័យខុនដូទំនើបដែលបន្តឲ្យមានការកើនឡើងនូវមូលធនក៏ដូចជាគម្លាតនៃប្រាក់ចំណេញខ្ពស់ជាងមុនដែលនាំឲ្យមានការកើនឡើងដែលមានសន្ទុះទាបតែប្រកបទៅដោយនិរន្តរភាព។
ប៉ុន្តែជាទូទៅតម្លៃដីធ្លីវិញបានកើនឡើង ១៤,១ ភាគរយសម្រាប់តំបន់លំនៅឋាន និង ៩,៧ ភាគរយសម្រាប់តំបន់ពាណិជ្ជកម្មដែលតួលេខនេះជាតួលេខដែលខ្ពស់ជាងគេក្នុងចំណោមប្រទេសទាំងអស់ដែលត្រូវបានវិភាគ។
លោក Ross Wheble អ្នកគ្រប់គ្រងក្នុងប្រទេសរបស់ក្រុមហ៊ុន Knight Frank បានពន្យល់ថាការថយចុះក្នុងទីផ្សារតំបន់អាស៊ានបាន «ផ្តល់ផលប្រយោជន៍ដល់ប្រទេសកម្ពុជាតាមរយៈការហូរចូលនៃអ្នកអភិវឌ្ឍក៏ដូចជាអ្នកវិនិយោគបរទេសដែលកំពុងតែព្យាយាមឆ្លៀតឱកាសទាញយកផលប្រយោជន៍តាមរយៈអចលនវត្ថុដែលមានតម្លៃទាបបើប្រៀបធៀបនឹងភាពងាយស្រួលសម្រាប់ជនបរទេសក្នុងការទទួលបានសិទ្ធិកាន់កាប់អចលនវត្ថុ (ទីតាំងដែលនៅលើជាន់ផ្ទាល់ដី)»។
ទោះជាយ៉ាងណាក៏ដោយរបាយការណ៍នេះបានបន្ថែមទៀតថាការរីកចម្រើននៅក្នុងប្រទេសកម្ពុជាបានមានសន្ទុះថយចុះនៅក្នុងត្រីមាសទី ២ នៃឆ្នាំនេះដែលការថយចុះនេះអាចបង្ហាញឲ្យឃើញថាតម្លៃអចលនវត្ថុនៅប្រទេសកម្ពុជាបានកើនឡើងដល់ចំណុចកំពូលហើយក៏ប្រហែលជានឹងអាចថយចុះខណៈពេលដែលសមាហរ័ណកម្មកំពុងតែខិតចូលមកនេះដែរ។
ចំពោះមូលហេតុនៃការកើនឡើងដល់ចំណុចកំពូលរបស់តម្លៃអចលវត្ថុនេះលោក Wheble បាននិយាយថាកម្រិតនៃការលក់គម្រោងខុនដូថ្មីៗបាន «ថយចុះបន្តិចបន្តួច» នៅក្នុងពាក់កណ្តាលដំបូងនៃឆ្នាំ ២០១៥ នេះបើប្រៀបធៀបនឹងឆ្នាំ ២០១៤ ។
លោកបានបន្តថា៖ «ពួកយើងគិតថាការថយចុះនេះគឺអាចបណ្តាលមកពីកំណើនកើនឡើងនៃតម្លៃរបស់តំបន់អភិវឌ្ឍថ្មីៗ។ វាបង្ហាញឲ្យយើងឃើញថាតម្លៃទីផ្សារនៅក្នុងតំបន់សំខាន់ៗនោះកំពុងតែកើនឡើងដល់ចំណុចកំពូលមួយ»។
របាយការណ៍នេះក៏បានសង្កត់ធ្ងន់ដែរថាទោះបីជាកម្រិតតម្លៃជួលរបស់អគារការិយាល័យនៅប្រទេសកម្ពុជានៅតែមានលក្ខណៈទាបនៅឡើយតែការព្រមព្រៀងក្នុងការធ្វើការអភិវឌ្ឍថ្មីៗគឺជាកាតាលីករដែលជំរុញឲ្យតម្លៃអចលនវត្ថុពាណិជ្ជកម្មកើនឡើង។
លោក Wheble បានបន្ថែមទៀតថាការកើនឡើងនៃតម្លៃដីពាណិជ្ជកម្មគឺជាផ្នែកមួយនៃគោលការណ៍ផែនការគម្រោងជាជាងការសញ្ជឹងគិតពីសក្តានុពលនៃការរីកចម្រើននៅតាមតំបន់មួយចំនួននាពេលអនាគត។
ទោះជាយ៉ាងនេះក៏ដោយលោកបានបន្តថា៖ «ទាល់តែគម្រោងសម្រាប់ថ្ងៃអនាគតទាំងនេះត្រូវបានដាក់ធ្វើជាផ្លូវការទើបយើងអាចវាស់មើលពីកម្រិតនៃតម្រូវការក្នុងវិស័យពាណិជ្ជកម្មនេះឲ្យបានត្រឹមត្រូវបាន»។
ក្នុងខណៈពេលដែលសមាហរ័រណកម្មសេដ្ឋកិច្ចអាស៊ានដែលគេលើកមកនិយាយជារឿយៗនេះកំពុងតែខិតជិតមកដល់ទីផ្សារនៅក្នុងតំបន់អាស៊ាននេះកំពុងតែបង្ហាញពីលទ្ធផលខុសៗគ្នា។
លោក Wheble បាននិយាយថានេះមិនមែនបង្ហាញពីកម្រិតទំនុកចិត្តរបស់តំបន់នេះសម្រាប់ចុងឆ្នាំនោះទេប៉ុន្តែវាជាសញ្ញាមួយរបស់លក្ខខណ្ឌខុសៗគ្នារបស់ទីផ្សារនីមួយៗ៕
___________
ប្រភពដើម៖ ព័ត៌មាននេះដកស្រង់ចេញពី ភ្នំំពេញ ប៉ុស្តិ៍